09.06.2025. O Concello de Lugo, en resposta á solicitude presentada pola Asociación Provincial de Empresarios de Hostalería e Turismo de Lugo (Apehl), autoriza a ampliación de dúas horas sobre o horario límite de peche habitual en todos os establecementos de hostalería do municipio, con motivo da celebración do Arde Lucus.
Esta medida estará vixente desde a noite do xoves 12 ao venres 13 de xuño, ata a noite do sábado 14 ao domingo 15, coincidindo co desenvolvemento principal das actividades festivas.
O presidente da Apehl, Cheché Real, agradeceu ao Concello a receptividade da proposta e destacou que “esta ampliación horaria é fundamental para que a hostalería poida atender o incremento de público que xera o Arde Lucus, un dos eventos máis multitudinarios e significativos da cidade. Permítelles unha mellor organización do servizo, favorece o ambiente festivo e contribúe a dinamizar a economía local nestas datas tan sinaladas”.
