El Dotmas Bar, gañador da pasada edición, acolleu esta mañá a inauguración oficial do certame gastronómico, no que participan 37 establecementos da cidade.
06.11.2026. Cheché Real, presidente da Asociación Provincial de Empresarios de Hostalería e Turismo de Lugo (Apehl); José Manuel Cela, vicepresidente da asociación, e Agustín Gallego, concelleiro de Turismo e Museos do Concello de Lugo, foron os encargados de inaugurar esta mañá en El Dotmas Bar a vixésimo primeira edición do Concurso de Tapas de Lugo.
O establecemento, gañador da pasada edición, acolleu o acto que marca o inicio dunha nova convocatoria deste certame gastronómico, no que participan un total de 37 locais da cidade. Nesta edición, El Dotmas Bar presenta a tapa Rizando o rizo, unha elaboración sen glute composta por unha ostra galega cociñada en leite de coco e curri, acompañada de mazá Granny Smith preparada a baixa temperatura, cebola vermella encurtida e un pétalo de rosa. Cheché Real animou aos lucenses a gozar das propostas dos establecementos e destacou a “atención marabillosa” que ofrecen os hostaleiros de Lugo.
O concurso, organizado pola Apehl, conta co patrocinio do Concello de Lugo e coa colaboración do Consello Regulador da Denominación de Orixe Ribeira Sacra, Estrella Galicia, Cabreiroá e a Universidade de Santiago de Compostela (USC).
O certame desenvolverase ata o vindeiro 22 de novembro e, unha semana máis tarde, os días 27, 28 e 29, terá lugar a gran final.
FUNCIONAMENTO DO CONCURSO
Os consumidores poderán valorar as propostas mediante un cupón de votación individual, que deberá estar cuberto cos seus datos e selado polo establecemento correspondente. A puntuación irá do 1 ao 5, sendo 1 a nota máis baixa e 5 a máis alta. Todos os cupóns válidos entrarán, ademais, no sorteo de distintos premios.
Así mesmo, os establecementos dispoñerán de folletos-pasaporte que os clientes poderán ir selando a medida que percorran os locais participantes. Quen consiga un mínimo de 12 selos entrará no sorteo dunha escapada gastro-relax para dúas persoas no Spa Arzuaga, na Ribera del Duero, mentres que aqueles que reúnan polo menos 25 selos poderán optar a unha viaxe dunha semana para dúas persoas a Roma.
GALARDÓNS ÁS MELLORES TAPAS
O público volverá ter un papel protagonista nesta edición, xa que será o encargado de elixir a tapa gañadora do concurso a través das súas votacións.
Pola súa banda, durante a gran final, que se celebrará os días 27, 28 e 29 de novembro, un xurado técnico outorgará o primeiro, segundo e terceiro premio, así como os recoñecementos á mellor maridaxe con Estrella Galicia e á mellor maridaxe con Ribeira Sacra.
SORTEO EN INSTAGRAM
Como en anteriores edicións, a Apehl celebra tamén un sorteo a través da súa conta de Instagram, @eparacomerlugo. Nesta ocasión, o premio será unha noite para dúas persoas no Hotel O Semáforo, en Fisterra (A Coruña).
Para participar será necesario seguir a conta @eparacomerlugo, subir a stories unha fotografía dalgunha das tapas participantes etiquetando a devandita conta e utilizando o hashtag #concursotapaslugo, e comentar a publicación do sorteo mencionando unha persoa coa que se queira compartir a estancia.
Os usuarios poden participar desde hoxe mesmo e o sorteo estará aberto ata o 22 de novembro. A persoa gañadora anunciarase o luns 23
ALÉRXENOS E INTOLERANCIAS
Unha das novidades do XXI Concurso de Tapas de Lugo é a incorporación de información máis detallada sobre os alérxenos presentes en cada unha das elaboracións, que poderá consultarse no folleto do certame.
Ademais, entre as 37 propostas participantes, 11 tapas son sen glute: as de 3 Pés, Eduri, El Dotmas Bar, Karrusel, Las Cinco Vigas, O Cincuenta e Seis, O Mercado, Paprica, Prebe by Bret, Toni Portela e Tosar by Boni. A elas súmanse La Pepita Lugo, que ofrece unha opción sen glute, e La Terraza del Méndez, cuxa proposta é apta para persoas celíacas se se serve sen pan.
LISTAXE DE PARTICIPANTES
Os 37 establecementos que participan nesta edición do Concurso de Tapas de Lugo son os seguintes:
Toda a información sobre as tapas participantes, os establecementos e o desenvolvemento do certame está dispoñible en xantardetapas.com.
