24.02.2025. A Asociación Provincial de Empresarios de Hostalería e Turismo de Lugo (Apehl) está levando a cabo un ano máis, co financiamento da Xunta de Galicia, un programa integrado de emprego no que se terá contacto con máis de 100 persoas demandantes de emprego de Lugo e Monforte de Lemos, co fin de buscar un 45 %, como mínimo, de insercións laborais.
O programa, ao que a Xunta de Galicia destina 220.000 euros, desenvolverá ata o mes de outubro actividades específicas como cursos de auxiliar de cociña, axudante de camareiro, manipulador de alimentos ou nocións de inglés básico para hostalería, entre outras. Tamén se promoverán obradoiros de entrevistas e actividades orientadas a mellorar as habilidades sociolaborais, a fomentar o emprendemento ou a favorecer o manexo das novas tecnoloxías. Ademais, prevese a realización de prácticas profesionais non laborais en empresas.
No marco deste programa, os usuarios do curso Axudante de camareiro/a, de 60 horas, recibiron a visita de Javier Arias, delegado territorial da Xunta en Lugo, acompañado de Carmen José López, directora territorial da Consellería de Emprego, Comercio e Emigración en Lugo; Cheché Real, presidente da Apehl, e Juan Agra, directivo da Apehl.
