27.11.2025. Cinco profesionais de referencia do sector hostaleiro e turístico serán os encargados de valorar esta fin de semana as 12 tapas finalistas do XX Concurso de Tapas de Lugo, organizado pola Asociación Provincial de Empresarios de Hostalería e Turismo de Lugo (Apehl) co patrocinio do Concello de Lugo.
As doce propostas culinarias máis votadas polo público competirán por cinco premios: primeiro, segundo e terceiro posto, ademais de dous galardóns especiais á mellor maridaxe con Estrella Galicia e á mellor maridaxe con viño da DO Ribeira Sacra.
O xurado desta edición estará formado por José Antonio Aparicio, presidente do Gremio de Restauradores da Praza Maior e de Hostelería de Madrid, vicepresidente primeiro de Hostelería de España e membro dos órganos de goberno de CEOE-CEIM, CEPYME, Cámara de Comercio e da Mesa de Expertos de Turismo de Madrid Turismo by Ifema; Anabel Costas, empresaria hoteleira do Pireneo, vicepresidenta da Asociación de Empresarios de Hostalería e Turismo de Huesca e directora do Centro de Innovación Gastronómica de Aragón; José Paz Gestoso, director do Centro Superior de Hostalería de Galicia e exdirector xerente do Xacobeo e de Turismo da Coruña; Constantino Iglesias, director xerente da asesoría Servicizos Gastronómicos e propietario de Tizar Gourmet en Ourense; e Juan Pozuelo, cociñeiro, formador e comunicador, director técnico da Academia Bocuse d’Or España, creador do concepto Hamburguesa Nostra e asesor de empresas.
Este equipo de expertos gastronómicos degustará este venres 28, sábado 29 e domingo 30 de novembro, as tapas dos establecementos finalistas: A Laxa, Casa María, El Boni, El Dotmas Bar, Glam Taoo, O Figón, O Mercado, Orixe do Campo, Paprica, Pulpería O Castelo, San Marcos Café e Tosar by Boni, nos que tamén estarán dispoñibles para o público xeral no mesmo horario establecido durante o concurso: de 13:00 a 15:30 h e de 20:00 a 22:30 h.
