10.09.2025. O posto …E para comer, Lugo rematará a súa ruta de promoción turística e gastronómica da provincia nas saídas de etapa da Vuelta Ciclista a España este vindeiro domingo e esta semana visitou as localidades galegas de Poio (Pontevedra) e O Barco de Valdeorras (Ourense).
As últimas catro paradas desta iniciativa da Asociación Provincial de Empresarios de Hostalería e Turismo de Lugo (Apehl), que conta co apoio da Xunta de Galicia e coa colaboración de varios consellos reguladores e asociacións de produtores, serán en Valladolid, Rueda (Valladolid), Robledo de Chavela (Madrid) e Alalpardo (Madrid).
O obxectivo da Apehl con este proxecto, que xa vai polo seu décimo terceiro ano, é presentar a provincia de Lugo no seu conxunto, dando a coñecer todo o bo que esta provincia ten para os visitantes.
Para iso, o estand …E para comer, Lugo instalouse na zona VIP das saídas de etapa desta edición. O persoal da Asociación é o encargado de ofrecerlles aos asistentes (ciclistas, patrocinadores, xornalistas especializados, visitantes...) petiscos elaborados con produtos da terra e material promocional da nova edición da guía turístico-gastronómica …E para comer, Lugo.
Entre os provedores e entidades colaboradoras figuran os consellos reguladores da Ribeira Sacra, Ternera Gallega, Queixo Arzúa-Ulloa, Queixo de O Cebreiro, Queixo de Tetilla, Queixo San Simón da Costa, Pataca de Galicia, Castaña de Galicia, Pementos de Mougán, Mel de Galicia, Pan de Cea e Aceite de Quiroga, así como as asociacións Avimós, Asovega, Asoporcel, Afapan, Acruga e Armadores de Burela. Tamén colaboran Galletas Daveiga, Montepicato, Estrella Galicia, Cafés Candelas, El Progreso, INPE, Transportes Valín e Hijos, Grupo Cinematográfico Fonmiñá, Experiencias de Calidade Galicia e Jazz Lugo.
