15.09.2025. O posto …E para comer, Lugo puxo o broche final ao seu percorrido por España xunto a La Vuelta Ciclista 2025, tras varias semanas de intensa actividade promocional. Por décimo terceiro ano consecutivo, a provincia lucense estivo presente nesta cita deportiva de referencia, promocionando a súa riqueza gastronómica e turística grazas á iniciativa da Asociación Provincial de Empresarios de Hostalería e Turismo de Lugo (Apehl) e o apoio da Xunta de Galicia.
Ao longo de todas as etapas, o stand estivo situado na zona VIP das saídas, converténdose nun escaparate privilexiado no que ciclistas, patrocinadores, medios de comunicación e invitados puideron degustar petiscos elaborados con produtos autóctonos e levar material promocional da nova edición da guía turístico-gastronómica …E para comer, Lugo.
A Apehl agradece a colaboración de La Vuelta e dos consellos reguladores, entidades e empresas que fixeron posible esta acción, contribuíndo a difundir a calidade dos produtos lucenses e reforzar a imaxe de Lugo como destino turístico e gastronómico de primeiro nivel.
Entre os provedores e entidades colaboradoras figuran os consellos reguladores da Ribeira Sacra, Ternera Gallega, Queixo Arzúa-Ulloa, Queixo de O Cebreiro, Queixo de Tetilla, Queixo San Simón da Costa, Pataca de Galicia, Castaña de Galicia, Pementos de Mougán, Mel de Galicia, Pan de Cea e Aceite de Quiroga, así como as asociacións Avimós, Asovega, Asoporcel, Afapan, Acruga e Armadores de Burela. Tamén colaboran Galletas Daveiga, Montepicato, Estrella Galicia, Cafés Candelas, El Progreso, INPE, Transportes Valín e Hijos, Grupo Cinematográfico Fonmiñá, Experiencias de Calidade Galicia (Agacal) e Jazz Lugo.
