10.07.2024. Trala celebración onte da VIII Gala Show Cooking na que se seleccionou o Mellor Cociñeiro de Tapas por Galicia, Cheché Real, presidente de Hostelería e Turismo de Galicia, confederación integrada polas asociacións provinciais de hostalería e turismo da Coruña, Lugo, Ourense e Pontevedra, lamentou esta mañá “a nomenclatura do devandito premio, xa que se debera falar do Mellor Cociñeiro de Tapas das Sete Cidades Galegas, pois neste certame só están representados cociñeiros destas sete localidades”.
Neste senso, Real salientou que “non é posible que un profesional de Guitiriz, de Coirós ou de Bueu sexa seleccionado, porque simplemente non se lle ofrece a posibilidade”, algo que cualifica de inxusto.
Por outra banda, insiste en que “a maiores, o nome do galardón Mellor Cociñeiro de Tapas por Galicia estase cambiando habitualmente nos distintos medios de comunicación e redes sociais por Mellor Cociñeiro de Tapas de Galicia, algo que aínda acrecenta máis o asunto”.
Así mesmo, felicita a todos os participantes, especialmente aos gañadores Manu Triay, da Taberna Triay, da Coruña, seleccionado polo xurado profesional, e Adrián Pérez, do restaurante Sinxelo, de Ferrol, que se fixo co premio do xurado popular.
Foto: Turismo de Galicia
