21.10.2025. A Asociación Provincial de Empresarios de Hostalería e Turismo de Lugo (Apehl) e a Asociación de Amigos do Camiño de Santiago da provincia de Lugo opóñense ao novo sistema de rexistro de viaxeiros que o Ministerio do Interior puxo en marcha co Real Decreto 933/2021. Consideran que “incumpre as normativas europeas sobre libre circulación de viaxeiros e protección de datos e xera dúbidas sobre a legalidade na recollida, custodia e transmisión dos datos”.
Ambas entidades cren que o texto proposto “introduce obrigas administrativas excesivas para os aloxamentos turísticos”, como indica Cheché Real, presidente da Apehl, así como para outros establecementos que acollen peregrinos, especialmente en zonas rurais e do Camiño de Santiago, “nas que a xestión diaria recae a miúdo en pequenos negocios”, engade Ángel Trabada, presidente da Asociación de Amigos do Camiño de Santiago da provincia de Lugo.
Desde Apehl e Amigos do Camiño solicitan a Interior que revise o contido do Real Decreto e abra un proceso de diálogo co sector antes da súa aprobación definitiva, “co fin de garantir un equilibrio entre a seguridade, a protección de datos e a sustentabilidade da actividade turística”.
Real e Trabada piden que “se recupere o sentido común para plasmalo nunha norma sinxela, proporcionada, axustada a dereito e que permita cumprir os obxectivos de mantemento e incremento da seguridade en España”.
