20.07.2023. La Fuerza del Norte, plataforma do sector turístico constituída polas asociacións de hostalería e turismo das provincias da Coruña, Lugo e Pontevedra, en Galicia; Bizcaia e Gipuzkoa, no País Vasco, Cantabria e Asturias, mantivo un encontro coas candidatas e candidatos do Partido Popular ao Congreso dos Deputados e ao Senado das distintas circunscricións electorais das citadas comunidades para analizar a situación do turismo nestes territorios que forman a España Verde, que ten características comúns e problemas e dificultades similares.
Por parte de La Fuerza del Norte participaron Jose Luís Álvarez Almeida, presidente de OTEA, xunto con Javier Martínez, vicepresidente de OTEA, e Eva Coppen, xerente; Héctor Sánchez, xerente da Asociación de Hostalería de Bizkaia; Javier Bedia, presidente da Asociación de Cantabria; Ángel Cuevas, expresidente da Asociación de Cantabria; Cheché Real, presidente da Asociación de Lugo, e Héctor Cañete e Andrea Díaz, presidente e xerente da Asociación de Coruña.
Por parte do Partido Popular asistiron os candidatos ao Congreso por Asturias Esther Llamazares, Mercedes Fernández, Silverio Argüelles, Jesús Suárez; a secretaria do PP Vasco e candidata ao Congreso, Laura Garrido; o candidato ao Senado por Cantabria, Juan Carlos García Diego, e o director de Turismo de Galicia, José Manuel Merelles.
Durante o encontro, convocado por petición do propio Partido Popular, os candidatos recibiron un documento elaborado polo conxunto das asociacións integradas en La Fuerza del Norte onde se analizan os retos e oportunidades existentes que, polo seu carácter supraautonómico, afectan as catro comunidades. O documento ofrece propostas para o desenvolvemento e mellora do sector e expón solucións a algúns problemas existentes.
A reunión estruturouse en catro eixos, dentro dos cales se trataron diferentes temas de interese. Os eixos foron os seguintes: mobilidade (conexión ferroviaria do corredor do Cántabrico e puntos de recarga de vehículos eléctricos), normativa (vivendas de uso turístico, competencia desleal, devolución IAE covid), proxectos (observatorio turístico análise de datos, peregrinos polo norte, tardeo e festivais), emprego e formación (arraigamento por formación, situación do mercado laboral e formación).
