• O certame celebrarase do 6 ao 22 de novembro e a gran final terá lugar os días 27, 28 e 29 do mesmo mes.
• Os consumidores poderán optar a unha escapada gastro-relax en Ribera del Duero e a unha viaxe dunha semana a Roma, entre outros premios.
02.11.2026. O Concello de Lugo acolleu hoxe a presentación da vixésimo primeira edición do Concurso de Tapas de Lugo, unha das grandes citas gastronómicas do outono na cidade e que este ano reunirá 37 establecementos hostaleiros. No acto estiveron presentes a alcaldesa de Lugo, Elena Candia; os edís de Turismo e Museos, e Industria e Mercados, Agustín Gallego e Silvia Colmenero; e o vicepresidente e o presidente da Apehl, José Manuel Cela e Cheché Real.
O certame, organizado pola Asociación Provincial de Empresarios de Hostalería e Turismo de Lugo (Apehl), conta co patrocinio do Concello de Lugo e coa colaboración do Consello Regulador da Denominación de Orixe Ribeira Sacra, Estrella Galicia, Cabreiroá e a Universidade de Santiago de Compostela (USC).
O XXI Concurso de Tapas de Lugo desenvolverase entre os días 6 e 22 de novembro e, unha semana máis tarde, os días 27, 28 e 29, terá lugar a gran final do certame.
Desenvolvemento do certame
Durante o concurso, as tapas estarán dispoñibles para o público todos os días, como mínimo, de 13:00 a 15:30 horas e de 20:00 a 22:30 horas.
Os consumidores poderán valorar as propostas mediante un cupón de votación individual, que deberá estar cuberto cos seus datos e selado polo establecemento correspondente. A puntuación irá do 1 ao 5, sendo 1 a nota mínima e 5 a máxima. Todos os cupóns válidos entrarán, ademais, no sorteo de distintos premios.
Como en anteriores edicións, os establecementos disporán tamén de folletos-pasaporte que os clientes poderán ir selando a medida que percorran os locais participantes.
Quen consiga polo menos 12 selos entrará no sorteo dunha escapada gastro-relax para dúas persoas no Spa Arzuaga, en Ribera del Duero. Cun mínimo de 25 establecementos selados, poderá optar a unha viaxe dunha semana para dúas persoas a Roma.
Premios ás mellores tapas
O público volverá ter un papel protagonista como xurado popular e será o encargado de elixir a tapa gañadora do concurso.
Pola súa banda, un xurado técnico outorgará o primeiro, segundo e terceiro premio, ademais dos recoñecementos á mellor maridaxe con Estrella Galicia e á mellor maridaxe con Ribeira Sacra.
A gran final celebrarase os días 27, 28 e 29 de novembro.
Sorteo en Instagram
A Apehl poñerá novamente en marcha un sorteo a través da súa conta de Instagram @eparacomerlugo. Nesta ocasión, o premio será unha noite para dúas persoas no Hotel O Semáforo, en Fisterra (A Coruña).
Poderase participar entre o 6 e o 22 de novembro e o gañador anunciarase o luns 23. Para entrar no sorteo será necesario seguir a conta @eparacomerlugo, subir a stories unha fotografía dalgunha das tapas participantes etiquetando a conta e utilizando o hashtag #concursotapaslugo, e comentar a publicación do sorteo mencionando unha persoa coa que se queira compartir a estancia.
37 establecementos participantes
Un total de 37 establecementos forman parte desta XXI edición do Concurso de Tapas de Lugo:
Propostas sen glute e información sobre alérxenos
Como novidade nesta edición, o concurso reforza a información destinada ás persoas con celiaquía e outras intolerancias alimentarias.
Entre o total das propostas participantes, 11 tapas son sen glute: as de 3 Pés, Eduri, El Dotmas Bar, Karrusel, Las Cinco Vigas, O Cincuenta e Seis, O Mercado, Paprica, Prebe by Bret, Toni Portela e Tosar by Boni. Ademais, La Pepita Lugo ofrece unha opción sen glute e La Terraza del Méndez indica que a súa proposta é apta para celíacos sen o pan.
O folleto do certame inclúe tamén información detallada sobre os alérxenos presentes en cada elaboración, co obxectivo de facilitar unha elección máis segura e informada aos consumidores.
Toda a información sobre os establecementos, as tapas participantes e o desenvolvemento do certame poderá consultarse en www.xantardetapas.com.
