05.06.2024. A Asociación Provincial de Empresarios de Hostalería e Turismo de Lugo (Apehl) está a levar a cabo un ano máis, co financiamento da Consellería de Emprego, Comercio e Inmigración e Industria da Xunta de Galicia, un programa integrado de emprego no que se terá contacto con máis de 100 persoas demandantes de emprego tanto do concello de Lugo como do de Monforte de Lemos, co fin de buscar un 45 %, como mínimo, de insercións laborais.
Destinado a mulleres desempregadas, persoas desempregadas menores de 30 anos ou maiores de 45 anos, con discapacidade ou inmigrantes, o programa desenvolve accións como a formación transversal en idiomas, competencias dixitais para o emprego, prevención de riscos, intelixencia emocional, busca de emprego, asesoramento, realización do certificado de profesionalidade ou o emparellamento dos participantes con ofertas de traballo.
Neste sentido e para fomentar o contacto entre ambas partes, esta mañá celebrouse na sede de Apehl en Lugo un networking entre empresarios do sector e algúns dos usuarios do programa.
En primeiro lugar, Alejandro Méndez, socio fundador e cociñeiro de Arrocería Os Cachivaches, expuxo un breve resumo da súa traxectoria profesional, de como facer medrar e levantar un negocio de hostalería e enumerou as habilidades que busca un empresario á hora de seleccionar un traballador. Seguidamente, Alberto García, socio fundador de Eventos Mesón de Alberto, detívose en compartir a súa experiencia de medrar no seo dunha familia hostaleira, falou de como se adaptou profesionalmente aos novos tempos e tamén explicou que busca un empresario nun traballador.
O acto contou coa presenza do presidente de Apehl, Cheché Real, e do delegado territorial da Xunta de Galicia en Lugo, Javier Arias.
